Şəhid və qazi övladları üçün əyləncəli tədbir təşkil edilib
Şəhər İcra Hakimiyyətinin təşkilatçılığı ilə Naftalanlı şəhid və qazi övladları 31 Dekabr – Dünya Azərbaycanlılarının Həmrəyliyi Günü və Yeni il bayramı ərəfəsində hazırlanmış proqram əsasında Gəncə şəhərinə səfər ediblər.
Uşaqların bayram günlərini daha rəngarəng etmək üçün əyləncəli proqram təşkil olunub, uşaqlar "GəncLand" istirahət mərkəzində sirkdə olublar. "Yeni İl Macərası" adlı beynəlxalq sirk proqramında dünyaca məşhur sirk artistləri çıxış ediblər. Onların arasında əyləncəli klounun, akrobatların, gimnastların, ekvilibristlərin, ayının və tutuquşularının nümayiş etdirilən bir-birindən maraqlı nömrələri uşaqların, eləcə də valideynlərin marağına və sevincinə səbəb olub.
Övladlarını müşayiət edən valideynlər daima diqqətlə əhatə olunduqları üçün və göstərilən diqqət qayğıya görə ölkə rəhbərliyinə minnətdarlıqlarını bildiriblər.
Qeyd edək ki, “GəncLand” istirahət mərkəzində Beynəlxalq standartlara cavab verən, ölkənin ən böyük daimi sirk şapitosunun quraşdırılması Ümumdünya Sirk Sənəti Festivalının Ali Mükafatları laureatı, sirk proqramlarının təşkilatçısı Allahverdi İsrafilov təşkilatçılığı ilə həyata keçirilib.
