Naftalanda keçirilən ağacəkmə aksiyasında ilk dəfə olaraq yerli şəraitə uyğunlaşdırılmış Adəmalması (maklyura) ağacı əkilib
Beynəlxalq turizm mərkəzi olan Naftalanda yaşıllıqların salınması artıq ənənə halını almışdır. Son üç ayda şəhərin Heydər Əliyev, Nəriman Nərimanov və Qələbə parklarında, eləcə də prospekt və yol kənarlarında 3200 - dən çox ağac əkilib. Ağacəkmə aksiyaları çərçivəsində əsasən Kedra, Zeytun, Akasiya, Kiparis, Çinar və Adəmalması ağaclarının əkilməsinə üstünlük verilib.
Naftalan yalnız buraya gələn on minlərlə turist üçün təkcə özünün unikal tərkibə malik nefti ilə deyil, həm də quru və sağlam mikro iqlimi ilə şəfaverici xüsusiyyətə malikdir. Naftalanın bu cür iqlimini formalaşdıran amil isə ərazinin iqlim xüsusiyyətləri və vaxtilə bu kurort şəhərində əkilmiş minlərlə şam ağacıdır. Hazırda planetar miqyasda baş verən qlobal iqlim dəyişmələri səbəbilə son vaxtlar Naftalanda şəhər landşaftının formalaşdırılmasında əsasən yerli şəraitə uyğunlaşan və bol oksigen hasil edən ağacların əkilməsinə üstünlük verilir.
Məhz bu cür ağaclardan biri də Adəmalmasıdır. Qeyd edək ki, Vətəni Avropa qitəsi olan Adəmalması tutkimilər fəsiləsinə aid bitki cinsidir. Yaşıl, yumru meyvələri və enli yarpaqları olan Adəmalması bol oksigen hasilinə görə ən faydalı ağac hesab edilir.
