Naftalan şəhərinin sosial-iqtisadi inkişafı ilə əlaqədar 2017-ci ilin doqquz ayında görülmüş işlər və qarşıda duran vəzifələrə dair hesabat iclası keçirilib.
13 oktyabr 2017-ci il tarixdə Naftalan şəhərinin sosial-iqtisadi inkişafı ilə əlaqədar 2017-ci ilin doqquz ayında görülmüş işlər və qarşıda duran vəzifələrə dair hesabat iclası keçirilib.
Yığıncağın işində Naftalan şəhər İcra Hakimiyyəti başçısı Natiq Aslanov, Şuranın üzvləri, kənd və şəhər nümayəndələri, bələdiyyə sədrləri, müəssisə rəhbərləri və şəhər ictimaiyyətinin nümayəndələri iştirak edirdilər.
Hesabat yığıncağında çıxış edən Naftalan şəhər İcra Hakimiyyəti başçısı Natiq Aslanov qeyd etdi ki, son illər möhtərəm Prezidentimiz cənab İlham Əliyevin rəhbərliyi altında Naftalanda istər turizm, istərsə də şəhərin infrastrukturunda irimiqyaslı layihələr həyata keçirilmişdir. Şəhərin iqtisadi və sosial həyatında baş verən müsbət dəyişikliklər özünü statistik göstəricilərdə də əks etdirir.
2017-ci ilin doqquz ayında ümumi məhsul buraxılışı keçən ilin müvafiq dövrü ilə müqayisədə 54.3 faiz artaraq 15 mln 45 min manat, iqtisadiyyatın aparıcı sahəsi olan sənaye məhsulu xidmətlərinin həcmi 10.5 faiz artaraq 1 mln 502 min manat təşkil etmişdir. Əhaliyə 190.7 min manatlıq nəqliyyat xidməti göstərilmiş, əhalinin həyat səviyyəsini xarakterizə edən əsas göstəricilərdən biri olan ödənişli xidmətlərin həcmi 11 mln 421 min manat olmuşdur. Pərakəndə əmtəə dövriyyəsinin həcmi 17 mln 207 min manat, bir işçiyə hesablanmış orta aylıq əmək haqqı isə 278.7 manat, hüquqi və fiziki şəxslərə göstərilən informasiya və rabitə xidməti keçən ilin hesabat dövrü ilə müqayisədə 15.7 faiz artaraq 156.4 min manat təşkil etmişdir. Ümumi məhsul buraxılışının həcmində kənd təsərrüfatı məhsulunun payı 921.5 min manat, tikinti-quraşdırma işləri isə 4.8 dəfə artaraq 6 mln 700 min manat təşkil etmişdir. Şəhər büdcəsi yerli mənbələrdən daxil olan gəlirlər hesabına 2 mln 87.6 min manat planlaşdırıldığı halda 2 mln 326 min manat olmuşdur. Yəni nəzərdə tutulduğundan 11,4 faiz artıq olmuşdur. Xərclər isə 1 mln 733 min manat olmuşdur.
Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun şəhər şöbəsi tərəfindən 512 ailəyə ünvanlı dövlət sosial yardım və sosial müavinət ödənilmişdir. 27 nəfər əlilə istirahət və müalicə üçün sanatoriya-kurort yollayışı verilmişdir. Hesabat dövründə 36 nəfərə müvafiq kateqoriyalar üzrə pensiya təyinatı aparılmış, ümumilikdə şəhər üzrə 1520 nəfər pensiyaçıya xidmət göstərilmişdir. Proqnoz tapşırıqları 89,9 faiz icra olunmuşdur. Proqnoz tapşırıqların ötən ilin müvafiq dövrü ilə müqayisədə aşağı olmuşdur ki, bunun da əsas səbəbi 3 hüquqi şəxsin qeydiyyat ünvanını dəyişməsidir.
Məşğulluq Mərkəzinə müraciət edən 359 nəfər işaxtarandan 216 nəfəri işlə təmin olunmuşdur. Son illər sahibkarlar tərəfindən tikilib istifadəyə verilmiş müasir səviyyəli yeni 3 və 5 ulduzlu müalicə və istirahət mərkəzlərində 900-dən artıq vətəndaş işlə təmin edilmişdir. İşsizliyin azaldılması daim diqqət mərkəzində saxlanılmalıdır. Bu səbəbdən şəhər Məşğulluq mərkəzi ilə sıx işgüzar əlaqələr qurulmuş və bu istiqamətdə işlər davam etdirilir.
Yalnız bu sahədə müəyyən çatışmazlıqlar mövcuddur. Belə ki, bəzi hallarda mövcud vakant iş yerlərinin vaxtlı-vaxtında təqdim olunmasında müəyyən çətinliklər yaranır. Bu isə öz növbəsində işaxtaran vətəndaşların işlə təmin olunmasına mənfi təsir göstərir. Buna görə də şəhərin idarə, müəssisə rəhbərlərinin bu işə daha məsuliyyətlə yanaşmaları tövsiyyə edilir.
İctimai-siyasi tədbirlərin hazırlanıb keçirilməsinə xüsusi fikir verilmiş, humanitar sahədə bir çox işlər həyata keçirilmişdir. Təhsil müəssisələrinə diqqət nəzarətdə saxlanılmış, tədrisin keyfiyyətinin yaxşılaşdırılması məqsədilə bir sıra işlər görülmüşdür.
Naftalan şəhər İcra Hakimiyyətinin başçısı qeyd etdi ki, 2016-2017-ci tədris ilində Naftalan şəhərinin ümumtəhsil məktəblərinin 11-ci sinfini 62 şagird bitirmiş, həmin məzunlardan 28-i respublikanın müxtəlif ali məktəblərinə qəbul olunmuşlar. Naftalandan bu il ali təhsil müəssisələrinə qəbulolma göstəricisi 46 faiz olub. Bu, ötən tədris ili ilə müqayisədə 6 faiz çoxdur. Hazırda yeni tədris ilinin başlanğıcıdır. Naftalan şəhəri üzrə yeni tədris ilində I sinifə qəbul olan uşaqların sayı 160-olmuş, onlardan 20-si xüsusi istedada malik uşaqlardır. Təhsil işçilərini 2017-2018-ci dərs ilinin başlanması münasibətilə təbrik etdi və yeni dərs ilində təhsil işçilərinə möhkəm cansağlığı, yeni-yeni nailiyyətlər dilədi.
Hesabat dövründə mühüm tarixi hadisələrə, bayramlara həsr olunmuş tədbirlər əhatə və təsir dairəsinə görə fərqlənmişdir. Bayram günlərində Naftalan şəhər Uşaq Musiqi məktəbinin müəllim və şagird kollektivi tərəfindən sakinlərin, eləcə də turistlərin asudə vaxtlarını səmərəli keçirmələri üçün konsert proqramları təşkil olunmuşdur.
Bu dövrdə yeniyetmə və gənclərin sağlamlığının qorunması, idmanın inkişaf etdirilməsi, eləcə şəhər sakinlərinin idmanla məşğulluğunun təmin edilməsi istiqamətində müəyyən işlər görülmüşdür. Şəhərdə ayrı-ayrı idman növləri üzrə müxtəlif yaş qrupları arasında idman yarışları keçirilmiş, bu dövrdə şəhərimizin gənc idmançıları müxtəlif respublika və zona turnirlərində uğurlu çıxışlar etmişlər.
Ümumilikdə gənclər və idman sahəsi üzrə şəhərdə keçirilmiş 36-a yaxın müxtəlif tədbir və idman yarışlarında 1000 nəfərdən artıq yeniyetmə və gəncin iştirakı təmin olunmuşdur.
Səhiyyə müəssisələri tərəfindən əhaliyə göstərilən tibbi xidmətin səviyyəsinin yüksəldilməsi, sanitar-gigiyenik vəziyyətə müntəzəm nəzarət edilməsi istiqamətində bir sıra zəruri tədbirlər görülmüşdür. Hesabat dövründə 396 nəfər imtiyazlı xəstə hər ay güzəştli dərman preparatları ilə təmin edilmişdir. Təcili Tibbi yardım məntəqəsində doqquz ay ərzində 1374 çağırış qeydə alınmış, tibb işçiləri tərəfindən onlara vaxtında tibbi yardım göstərilmişdir. Əhaliyə göstərilən tibbi xidmətin yeni tələblər səviyyəsinə çatdırılması məqsədilə şəhərdə yeni xəstəxananın tikintisi işləri hesabat dövründə davam etdirilmişdir. Hazırda 5 mərtəbədən ibarət olacaq xəstəxana binasında üst mərtəbələrin tikintisi işləri aparılır.
Şəhərdə aparılan geniş quruculuq və abadlıq işləri cari ilin doqquz ayı ərzində də davam etdirilmişdir. Çoxmənzilli yaşayış binalarının qarşısında salınan mini istirahət parklarında və piyada yollarının kənarında 600-ə yaxın eldar şamı və 1000-dən artıq çinar ağacı əkilmişdir. II mikrorayonun ərazisində asfalt örtüyünün üst qatı qaşınaraq düzlənmiş, köhnə yol daşları sökülüb yenisi ilə əvəz olunmuşdur. 3350 p/m uzunluğunda yeni yol daşı düzülmüş və yeni asfalt örtüyü döşənmişdir. Binaların qarşısında avtonəqliyyat vasitələrinin maneəsiz şəkildə dayanması məqsədilə xüsusi yerlər düzəldilmişdir. Piyadalar üçün mövcud səkilər təmir edilmişdir. 8 beşmərtəbəli yaşayış binasının blokları əsaslı təmir olunmuş, suvaq və rəngləmə işləri aparılmışdır. Pilləkən və məhəccərlər təmir edilmişdir. Qeyd olunan işlər mərhələli şəkildə şəhərin digər binalarında da aparılacaqdır.
Payız-qış mövsümünə hazırlıq işlərinə yay aylarından başlanılmış, bununla əlaqədar şəhər İcra Hakimiyyəti Başçısı tərəfindən 2017-2018-ci illər payız-qış mövsümünə hazırlıqla əlaqədar tədbirlər planı hazırlanaraq təsdiq edilmişdir. Naftalan İstilik İstismarı sahəsinin balansında olan 3 qazanxananın hər birində cari profilaktiki təmir işləri aparılmış, qazanlar, çirktutanlar, çənlər açılaraq yuyulub təmizlənmiş və qazanxanalar qışa hazır vəziyyətə gətirilmişdir.
Hazırda çoxmənzilli yaşayış binalarının dam örtüklərində zəruri tədbirlər həyata keçirilir, sıradan çıxmış yağış suları axıdılan navalçalar yenilənir. Həmçinin şəhərdaxili yağış su barmaqlıqları təmizlənməsi işləri davam etdirilir.
Hesabat dövründə 10 mərtəbəli, 42 otaqdan ibarət yeni “Avtovağzal Otel” kompleksində və əsaslı təmir və yenidənqurma işləri aparılan 10 mərtəbəli Naftalan mehmanxanasında tikinti işləri davam etdirilmişdir. Əlillərin Regional Bərpa Mərkəzində aparılan tikinti işləri gecikdirilməklə icra olunmuşdur.
Müasir dünyada turizm hər bir ölkə üçün iqtisadiyyatın ən dinamik inkişaf edən sahələrindən biri sayılır. Dövlətimizin başçısı ölkəmizdə turizmin inkişafını vacib istiqamətlərdən biri kimi şəxsən diqqətdə saxlayır. Bütün bunlar bizi daha böyük uğurlara ruhlandırır. Çünki bu gün Naftalan şəhəri nəinki ölkəmizdə, eləcə də yaxın və uzaq xaricdə məşhurlaşdırmışdır. Məhz bunun nəticəsidir ki, 2017-ci ilin doqquz ayında burada dincələn və müalicə olunan turistlərin sayı ötən ilin müvafiq dövrü ilə müqayisədə 59 faiz çox olmuşdur. Belə ki, 2017-cı ilin hesabat dövründə Naftalanın turizm obyektlərində 27 min 402 turist qeydə alınmışdır ki, bunun da 6538 nəfəri dünyanın 60-dək ölkəsindən gələn vətəndaşlardır.
2017-ci ilin ötən dövründə Şəhər Polis şöbəsi ictimai asayişin mühafizəsində, təhlükəsizliyin təmin edilməsində, hüquqpozmalara və cinayətkarlığa qarşı mübarizədə və axtarışda olan şəxslərin tutulmasında ardıcıl işlər görmüşlər. Doqquz ayda şəhər Polis şöbəsində 21 cinayət hadisəsi qeydə alınmış və cinayətlərin açılması 95 faiz təmin edilmişdir. 2 ağır və xüsusilə ağır cinayət hadisəsi qeydə alınmışdır.
Naftalan şəhər İcra Hakimiyyəti başçısı Natiq Aslanov çıxışına yekun vuraraq qeyd etdi ki, cənab Prezidentin öz çıxışlarında qeyd etdiyi kimi hər bir dövlət məmuru - biz hər birimiz xalqın xidmətçisiyik, xalqın və dövlətin mənafeyi uğrunda çalışırıq. Bu baxımdan sahibkarların, iş adamlarının fəaliyyəti üçün əlverişli şərait yaradılması, şəhərimizə yeni investorların cəlb edilməsi, yeni iş yerlərinin yaradılması bütün dövlət qurumlarının fəaliyyətinin ayrılmaz tərkib hissəsi olmalıdır və biz bu istiqamətdə öz fəaliyyətimizi quracagıq.
Şəhər İcra Hakimiyyətinin başçısı Naftalana göstərdiyi diqqət və qayğıya görə naftalanlılar adından Prezident cənab İlham Əliyevə dərin minnətdarlığını bildirdi.
Sonda şəhərin sosial-iqtisadi inkişafı ilə əlaqədar 2017-ci ilin ilin doqquz ayında görülmüş işlər və qarşıda duran vəzifələrə dair şəhər İcra Hakimiyyətinin başçısının hesabat məruzəsi ətrafında şəhər Təhsil şöbəsinin müdiri əvəzi Rəna Dəmirova və şəhər Maliyyə şöbəsinin rəisi Saleh Tağıyev çıxış etdilər.
