9 May-Faşizm üzərində qələbə günü Naftalan şəhərində təntənə ilə qeyd edildi.
Naftalan şəhər İcra Hakimiyyətinin təşkilatçılığı ilə 2015-ci il mayın 9-da faşizm üzərində qələbənin 70-ci ildönümü şəhər “Xatirə kompleksində” qeyd olundu.
Tədbirdə şəhərin hüquq mühafizə orqanlarının, idarə, müəssisə, təşkilatların rəhbərləri ilə yanaşı şəhər ictimaiyyəti və şəhərdə yerləşən N saylı hərbi hissənin əsgər və zabitləri də iştirak edib. “Xatirə kompleksində” vətən uğrunda həlak olan şəhidlərin xatirəsi yad edilmiş, əklil qoyulmuş, gül-çiçək düzülmüşdür.
Şəhər İcra Hakimiyyətinin başçısı Natiq Aslanov tədbiri giriş sözü ilə açaraq müharibə veteranlarını təbrik edib və onlara uğurlar arzulayıb. O bildirib ki, Azərbaycan da bu böyük Qələbənin əldə edilməsində əlindən gələni əsirgəməmiş, bu ağır müharibədə yüz minlərlə soydaşımız rəşadətlə döyüşmüşdür. 70 il əvvəl dünyanı faşizm dəhşətindən xilas edən və xalqlara azadlıq gətirən insanlar dərin minnətdarlığa və böyük hörmətə layiqdirlər
9 May-Qələbə Günü münasibətilə şəhər İcra Hakimiyyətinin başçısı tərəfindən Böyük Vətən müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım verilmişdir.
Tədbir məktəblilərin ifasında bədii kompozisiya ilə davam etmişdir.
