Naftalan şəhər təşkilatı Gənclər Birliyinin IV hesabat-seçki konfransı keçirilib.

  Bu gün Yeni Azərbaycan Partiyası Naftalan şəhər təşkilatı Gənclər Birliyinin IV hesabat-seçki konfransı keçirilib. Konfransda Naftalan Şəhər İcra Hakimiyyətinin başçısının müavini Afət Cabbarova, YAP Naftalan şəhər təşkilatının sədri Hatəm Qocayev, icra hakimiyyətinin məsul işçiləri, şəhərin fəal gəncləri, ziyalılar iştirak ediblər. Tədbiri giriş sözü ilə YAP Naftalan şəhər təşkilatının sədri Hatəm Qocayev açaraq konfrans iştirakçılarını salamlayıb, tədbirdə 80 nəfər nümayəndənin iştirak etdiyini bildirib və konfransın işinə uğurlar arzulayıb. Dövlət Himni səsləndirilib və Umummilli lider Heydər Əliyevin əziz xatirəsi bir dəqiqəlik sükutla yad edilib. H.Qocayev Dövlət gənclər siyasətindən, respublikada eləcə də şəhərdə aparılan quruculuq-abadlıq işlərindən, gənclərin şəhərin sosial-iqtisadi və mədəni həyatında yaxından iştirakından geniş bəhs etmişdir. Daha sonra Gənclər Birliyinin sədri Aynurə Novruzova hesabat məruzəsi ilə çıxış edərək ulu öndər Heydər Əliyevin və onun siyasi kursunun layiqli davamçısı, Azərbaycan Respublikasının Prezidenti cənab İlham Əliyevin rəhbərliyi ilə ölkədə həyata keçirilən dövlət gənclər siyasəti və bu siyasətin uğurlu nəticələrindən danışıb. O qeyd etmişdir ki, YAP Naftalan şəhər təşkilatının Gənclər Birliyi 1995-ci ildə təsis olunub. Bu gün şəhər partiya təşkilatının 1146 nəfər üzvündən 377 nəfəri gənclərdir. Hesabat dövründə gənclər şəhərin ictimai-siyasi həyatında fəal iştirak etmiş, bütün sahələrdə, həmçinin elmdə, təhsildə, idman sahələrində böyük uğurlar qazanmışlar. Fəaliyyət dövrü ərzində gənclərin maraqlarını əks etdirən bir sıra təlim və layihələr, tədbir və görüşlər keçirilmiş, gənclərin bilik və bacarıqlarını artırmağa yardımçı olan kurslar təşkil edilmişdir. Konfransda çıxış edən gənclər ölkə rəhbərliyinin gənclər siyasət haqqında qanundan, qəbul edilmiş dövlət proqramlarından geniş söhbət açaraq bunu Azərbaycan Respublikasının Prezident İlham Əliyevin Azərbaycan gənclərinə göstərdiyi diqqət və qayğının təzahürü kimi qiymətləndirmişlər. Konfrans iştirakçıları YAP Naftalan şəhər təşkilatı Gənclər Birliyinin hesabat dövründəki fəaliyyətini qənaətbəxş qiymətləndiriblər. Sonra konfransda təşkilati məsələlərə baxılıb. YAP Naftalan şəhər təşkilatı Gənclər Birliyinin şura və idarə heyətinin üzvləri, sədr və müavinləri seçiliblər. Gənclər yekdil rəylə A.Novruzovanın yenidən YAP Naftalan şəhər təşkilatı Gənclər Birliyinin sədri seçilməsinə səs veriblər. Naftalan şəhər İcra Hakimiyyəti başçısının müavini A.Cabbarova və YAP Naftalan şəhər təşkilatının sədri H.Qocayev Gənclər Birliyinin yeni heyətini təbrik edib,gələcək işlərində nailiyyətlər arzulayıblar. Sonda YAP Gənclər Birliyinin respublika konfransına 2 nəfər nümayəndə seçilib.