Naftalan məktəbliləri Rusiya Federasiyasının Stavropol diyarında
Naftalanlı məktəblilərin Yessentuki Şəhər Administrasiyasının dəvəti ilə reallaşan səfər proqramı zəngin olub. Onlar Yessentuki şəhəri ilə yanaşı, Stavropol diyarının digər turizm yerlərinə də ekskursiya ediblər.
Xatırladaq ki, ötən ilin avqust ayında Stavropol diyarının Yessentuki və Naftalan şəhərləri qardaşlaşıblar.
Yessentuki Şəhər Şurasının sədri Lüdmila Yefremova bildirib ki, o, 2014-cü ilin oktyabrında Yessentuki Şəhər Administrasiyasının nümayəndə heyəti ilə birlikdə Azərbaycanın Naftalan şəhərinə səfər edib və səfər çərçivəsində, Naftalanda rus mədəniyyətinə xüsusi diqqət göstərilməsi onda böyük təəssürat yaradıb. O, buna misal olaraq Naftalanda dahi rus şairi Mixail Lermontovun 200 illik yubileyinin yüksək səviyyədə qeyd olunmasını göstərib.
Növbəti mərhələdə isə Yessentuki məktəblilərinin Naftalan şəhərinə səfərləri təşkil olunması təklif edilib.
Məlumat üçün bildiririk ki, Rusiya Federasiyasının Stavropol diyarı Azərbaycan ilə turizm, kənd təsərrüfatı və digər sahələrdə əməkdaşlıq edir. Artıq bu əməkdaşlıq ənənə halını alıb.
