“20 Yanvar - müstəqillik mübarizəsinin qəhrəmanlıq tarixi”
Xalqımızın qəhrəmanlıq salnaməsi və şərəf günü kimi tariximizə həkk olunan 20 Yanvar faciəsinin 35-ci ildönümü ərəfəsində Naftalan Şəhər İcra Hakimiyyətinin təşkilatçılığı ilə “20 Yanvar - müstəqillik mübarizəsinin qəhrəmanlıq tarixi” mövzusunda tədbir keçirilib.
Öncə tədbir iştirakçıları Ümummilli Lider Heydər Əliyevin və şəhidlərin əziz xatirəsini bir dəqiqəlik sükutla yad ediblər.
Çıxış edənlər 20 Yanvar faciəsinin Azərbaycanın müstəqillik tarixi üçün əhəmiyyətini vurğulayaraq bu hadisənin xalqımızın suverenliyi uğrunda mübarizə əzmini daha da möhkəmləndirdiyini qeyd ediblər. Bildirilib ki, 20 Yanvar tarixi təkcə hüzn günü deyil, həm də milli birlik və azadlıq mübarizəsinin rəmzidir.
Vurğulanıb ki, 20 Yanvar faciəsi Azərbaycan xalqının tarixində və bütovlükdə XX əsrdə baş vermiş faciələr içərisində xüsusi amansızlığı ilə seçilən faciələrdəndir. Ümummilli Lider Heydər Əliyevin faciə haqqında həqiqətlərin dünya ictimaiyyətinə çatdırılmasında göstərdiyi müstəsna xidmətlərdən, milli-azadlıq uğrunda mübarizəyə qalxmış oğul və qızlarımızın fədakarlığı, xalqımızın qəhrəmanlığından söhbət açılıb.
Tədbir məktəblilərin hazırladıqları kompozisiya ilə sona çatıb.
