YAP Naftalan Şəhər Təşkilatının sədri ictimaiyyət nümayəndələrinə təqdim edilib

11 fevral 2022 | 16:00

Yeni Azərbaycan Partiyası Naftalan Şəhər təşkilatının yeni təyin edilmiş sədrinin təqdimatı keçirilib. Tədbirdə ŞİH başçısının müavini Arzu Məmmədov, YAP Naftalan şəhər Təşkilatının sədri Rövlan Heydərov, idarə, müəssisə, təşkilat rəhbərləri, ictimaiyyət nümayandələri, o cümlədən partiya fəalları iştirak edib.
Tədbir iştirakçıları öncə Ulu Öndər Heydər Əliyevin abidəsini ziyarət edib, önünə gül dəstələri düzüb, ruhunu böyük ehtiramla yad ediblər.
Görüş zamanı çıxış edən ŞİH başçısının müavini qeyd edib ki, Yeni Azərbaycan Partiyasının yaranması, keçdiyi şərəfli yol Azərbaycanın müasir tarixinin ən önəmli hadisələri sırasındadır. Yeni Azərbaycan Partiyası nəinki Azərbaycan tarixində, müasir dünyada ən uğurlu siyasi təşkilatlardan biridir. Bu gün Azərbaycan dünya miqyasında böyük hörmətə malik ölkə kimi qeyd edilir. Təbii ki, bu uğurlar Ulu Öndər Heydər Əliyevin əsasını qoyduğu düşünülmüş və məqsədyönlü siyasətin, eyni zamanda, bu xəttin möhtərəm Prezidentimiz cənab İlham Əliyev tərəfindən uğurla davam etdirilməsinin nəticəsidir.
Naftalan Şəhər İcra Hakimiyyəti başçısının müavini Arzu Məmmədov partiyanın yeni Nizamnaməsinin tələblərinə uyğun olaraq YAP İdarə Heyətinin 28 yanvar 2022-ci il tarixli qərarına əsasən partiyanın yerli təşkilatlarına sədrlər təyin olunduğunu bildirərək, YAP Naftalan Şəhər Təşkilatının sədri Heydərov Rövlan Nəsib oğlunu ictimaiyyətə təqdim edib.
YAP Naftalan Şəhər Təşkilatının yeni sədri çıxış edərək, Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevə və partiya rəhbərliyinə təşəkkürünü bildirib, bu etimadı layiqincə doğruldacağını, bundan sonra da Azərbaycan xalqına, dövlətinə və dövlətçiliyinə sədaqətlə xidmət edəcəyini vurğulayıb.

Keçidlər