Naftalanda daha bir turizm obyekti istifadəyə veriləcək

Azərbaycan Respublikasının Prezidenti cənab İlham Əliyevin investisiya və biznes mühitinin daha da yaxşılaşdırılması, özəl investisiyaların cəlb edilməsi məqsədilə şəhər və rayonlarda sahibkarlara müvafiq dəstək və köməkliyin göstərilməsi, yeni müəssisələrin açılması və əhalinin maddi rifahının yüksəldilməsi barədə verdiyi tapşırıqlarının icrasını təmin etmək məqsədilə Naftalan Şəhər İcra Hakimiyyəti tərəfindən müvafiq işlər görülmüş və bu işlər hazırda da uğurla davam etdirilir.
   Məlumdur ki, Naftalan unikal müalicəvi əhəmiyyətə malik olan “naftalan” nefti ilə məşhurdur. Ona görə də Naftalan sağlamlıq turizmi xidmətləri sahəsində böyük potensiala malikdir. Şəhərdə qeyri-neft sektorunda prioritet sahə əsasən turizm sahəsidir. Ölkə başçısının xüsusi diqqəti sayəsində Naftalanda son illər turizm sektorunun inkişaf etdirilməsi istiqamətində bir çox layihələr həyata keçirilmiş və şəhərin infrastrukturu tamamilə yenilənmişdir. Möhtərəm Prezidentimiz cənab İlham Əliyevin xeyir-duası ilə beynəlxalq səviyyəli yeni otel komplekslərinin açılışı olmuşdur.
   Cənab Prezidentin qeyd etdiyi kimi, dünyanın nadir turizm mərkəzlərindən birinə çevrilən Naftalana son illərdə gələn yerli və xarici turistlərin sayında qeydə alınmış artım dinamikası burada yeni turizm-sağlamlıq obyektlərinin tikilməsini zəruri edir. Bu məqsədlə mütəmadi olaraq sahibkarlarla görüşlər keçirilir, investisiyaların qoyulması məqsədəmüvafiq hesab olunan sahələr haqqında geniş məlumatlar verilir. Son illər ərzində sahibkarlar tərəfindən şəhər iqtisadiyyatının turizm sahəsinə böyük həcmdə özəl investisiyalar qoyulub.
   Hazırda şəhərdə son tamamlanma işləri aparılan daha bir turizm obyektinin 2022-ci ilin ilk aylarında istifadəyə verilməsi nəzərdə tutulub.
   Park Naftalan müalicə kompleksinin 1 hektara yaxın  ərazini əhatə edir.  Ümumi sahəsi 9000 kvadratmetr, tikintialtı sahəsi 1360 kvadratmetrdir. Hər biri altımərtəbəli iki korpusdan ibarət olan müalicə kompleksi ümumilikdə 88 otaq, 176 yerlikdir. Həmçinin kompleksin zirzəmisində texniki və yardımçı otaqlar, çamaşırxana, müalicə hovuzu, anbar, 1-ci mərtəbədə I mərtəbədə vanna və həkim otaqları, dördüncü mərtəbədə yeməkxana, həmçinin binada oyun otağı, açıq və qapalı restoranlar, bar və terras var.
   Park Naftalan  müalicə kompleksi fəaliyyətə başladıqdan sonra burada 55 nəfərə yaxın şəhər sakininin işlə təmin olunması nəzərdə tutulub.
   Qeyd edək ki, Naftalanda fəaliyyət göstərən turizm obyektlərində gün ərzində 3000-ə yaxın turist qarşılamaq, onlara yüksək səviyyədə xidmət göstərmək mümkündür. Yaxın gələcəkdə şəhərdə tikintisi davam etdirilən turizm obyektləri istifadəyə verildikdən sonra Naftalan gün ərzində, ümumilikdə, 3500-dən artıq turistə otel və müalicə xidmətləri göstərmək imkanına malik olacaq.