Naftalan şəhərində 20 Yanvar faciəsi ilə bağlı silsilə anım tədbirləri davam etdirilir.
18 yanvar 2017-ci il tarixdə Naftalan şəhər Z.Rüstəmov adına Qaşaltı Qaraqoyunlu kənd tam orta məktəbində 20 yanvar faciəsinin iyirmi yeddinci ildönümünə həsr olunmuş tədbir keçirilib.
Tədbiri giriş sözü ilə Z.Rüstəmov adına Qaşaltı Qaraqoyunlu kənd tam orta məktəbin direktoru Ulduz Mayılova açaraq qeyd etdi ki, 1990-cı il yanvarın 19-dan 20-nə keçən gecə Bakıda rus imperiyasının törətdiyi qanlı faciədən 27 il keçir. M.Qorbaçov başda olmaqla Sovet İttifaqının o vaxtkı rəhbərləri Azərbaycan xalqına xəbərdarlıq etmədən Bakıya qoşun yeritdilər. Böyük bir faciə baş verdi. Həmin gecə günahsız, əliyalın insanlar küçədə, yaşadığı evlərində gülləbaran edildilər. Bu hadisənin səhəri ilk etiraz səsini qaldıran məhz Azərbaycan xalqının böyük oğlu, ulu öndər Heydər Əliyev oldu. Ümummilli liderin Azərbaycan xalqının tələbi ilə ikinci dəfə hakimiyyətə gəlişindən sonra 20 Yanvar hadisəsinə siyasi qiymət verildi və əsl həqiqət bütün dünyaya bəyan edildi.
20 Yanvar faciəsi ilə bağlı məktəbdə şagirdlərin ifasında öz şərəfli ölümləri ilə tarix yazmış qəhrəman Vətən övladlarına həsr edilmiş şeirlər səsləndirildi və qanlı Yanvar faciəsinin dəhşətlərini əks etdirən ədəbi-bədii kompozisiya nümayiş etdirildi.
