Şriftin ölçüsü :

Saytın rəngi :

Azərbaycan Prezidentinin diplomatik qələbəsi

14 iyul 2020 | 16:00

Azərbaycan Respublikasının qlobal səviyyədə koronavirusla mübarizədə ən vacib tədbirlərindən biri Prezident İlham Əliyevin təşəbbüsü ilə Türkdilli dövlətlərin əməkdaşlıq şurasının Zirvə görüşünün keçirilməsi olmuşdur. Qoşulmama Hərəkatının sədri olan Azərbaycan Respublikasının Prezidenti cənab İlham Əliyevin təşəbbüsü ilə mayın 4-də Qoşulmama Hərəkatının Təmas Qrupunun COVİD-19 pandemiyasına həsr olunmuş onlayn zirvə görüşü təşkil edildi. Bu tədbirdə Qoşulmama Hərəkatına üzv dövlətlərlə yanaşı, BMT-nin Baş Katibi, BMT Baş Assambleyasının prezidenti, Ümumdünya Səhiyyə Təşkilatının Baş direktoru, Afrika İttifaqı və Avropa İttifaqı kimi beynəlxalq təşkilatlarının rəhbərləri iştirak ediblər. Tərkibində 120 ölkəni birləşdirən Qoşulmama Hərəkatı BMT-dən sonra dünya dövlətlərinin təmsil olunduğu ikinci ən böyük təşkilatdır.
    Zirvə görüşündəki çıxışında möhtərəm Prezidentimiz BMT Baş Assambleyasının  Xüsusi Sessiyasının çağırılması barədə təşəbbüslə çıxış etmişdir. Çox qürurverici haldır ki, bu günə qədər 130-a qədər ölkə rəhbəri təşəbbüsü yüksək qiymətləndirmiş və dəstəkləmişdir. Bu, Azərbaycana və ölkə Prezidenti cənab İlham Əliyevə olan böyük hörmətin və etimadın növbəti göstəricisidir. Təşəbbüsü dəstəkləyən ölkələr bütün dünyanı əhatə edir. Onların sırasında BMT Təhlükəsizlik Şurasının daimi üzvlərindən tutmuş, kiçik ada ölkələri də var. Dövlətlər tərəfindən bu məsələ ilə əlaqədar BMT Baş Katibinə ünvanlanan məktublarda Azərbaycan Respublikasının Prezidenti cənab İlham Əliyevin BMT Baş Assambleyasının Xüsusi Sessiyasının keçirilməsi ilə bağlı təşəbbüsünün vaxtında irəli sürülmüş və çox ehtiyac olan təşəbbüs olduğu vurğulanır. Bu təşəbbüsü dəstəkləməyən yeganə ölkə Ermənistan olub. Hətta Ermənistan höküməti BMT Baş Katibinə etiraz məktubu da yazıb. Yəni bütün bəşəriyyəti ölümlə hədələyən bəlaya qarşı ümumi mübarizə prosesində bu cür unikal təşəbbüsü dəstəkləməkdən imtina edir. Bununla da özünü bütün dünyanın gözündə biabır və rüsvay edir, Ermənistan faşist ideologiyasına xidmət edən dövlət olduğunu bir daha beynəlxalq aləmə bəyan edir.Dünyanın  təhdid olunduğu bir reallıqda hər bir dövlət və lider öz əməlini ortaya qoyur. Bu gün sözün həqiqi mənasında Azərbaycan dövləti və onun lideri cənab İlham Əliyev bütün dünya üçün bir nümunədir.
    Dünyada çoxları güman edirlər ki, ümumbəşəri bəlaya qarşı mübarizədə BMT TŞ-nin daimi üzvləri olan ABŞ, Rusiya, Böyük Britaniya və virusun ilk yayıldığı ölkə olan Çin ən böyük öhdəliyi üzərinə götürərək analoji təşəbbüslə çıxış edəcəklər. Lakin bu belə olmadı. Bu təşəbbüslə Azərbaycan Prezidenti cənab İlham Əliyev çıxış etdi. Azərbaycan Respublikası Prezidentinin digər təşəbbüsləri ilə yanaşı bu təşəbbüs də beynəlxalq aləmdə çox ciddi rezonansa səbəb oldu. Bu təşəbbüslə Azərbaycan Respublikasının Prezidenti bütün ölkələri həmrəyliyə, böyük məsuliyyət ortaya qoymağa çağırır. Çağırışın əsas qayəsi isə ondan ibarətdir ki, gəlin birləşək geosiyasi ambisiyanı kənara qoyub gözəgörünməz düşmənə qarşı birgə mübarizə aparaq.Azərbaycan xalqı əminliklə gözləyir ki, Azərbaycan Respublikası Prezidenti cənab İlham Əliyevin təşəbbüsü ilə dünya dövlətlərinin bu təşəbbüsü dəstəkləməsi nəticəsində BMT Baş Assambleyasının Xüsusi Sessiyası keçiriləcək və bu sessiya çərçivəsində dövlətlərin təcili və təxirəsalınmadan bir araya  gəlməsi, planeti bürüyən COVİD-19 bəlasından çıxış yollarının müzakirə edilməsi və həlli yollarının tapılması istiqamətində  mühüm qərarlar qəbul ediləcəkdir.
  BMT Təhlükəsizlik Şurasının Xüsusi Sessiyasının keçirilməsi barədə Azərbaycan Respublikasının Prezidenti cənab İlham Əliyevin təşəbbüsünü Rusiyanın BMT yanında daimi nümayəndəliyinin rəhbərliyi və Xarici İşlər Nazirliyinin sözçüsü də Rusiya tərəfinin Xüsusi Sessiyanın təşkili istiqamətində əməkdaşlığa hazır olduqlarını bildirmişlər.
    BMT tarixində 31 Xüsusi Sessiya keçirilmişdir. Lakin Azərbaycanın təklifi ilə Xüsusi Sessiya ilk dəfə olaraq dövlət və hökümət başçılarının səviyyəsində və videokonfrans formatında olacaqdır. Tam əminik ki, BMT bu çətin dövrdə liderliyi üzərinə götürməklə dünyanı bürüyən bu dəhşətli pandemiya bəlasından insanları xilas etmək üçün xüsusi qətnamə qəbul edəcəkdir. Artıq dünyada virtual formatda yüksək səviyyəli tədbirlərin keçirilməsi təcrübəsi formalaşıb. Ümid edirik ki, tezliklə Xüsusi Sessiya işə başlayacaq və sonda qəbul edilmiş qətnaməyə uyğun olaraq bütün üzv ölkələr pandemiya ilə mübarizəyə birlikdə və daha ciddi mübarizə aparacaqlar.

Keçidlər